Es is amoi da Brauch, St. Hörersdorf hast unsre Hoamat auch,

owa nur aun Sunn- und Feiertog, richten de Burschen uns an Kiritog aus.

Und so feier´n mia heit - wie jedes Joahr,

den Kiritog, des is jo amoi kloar.

 

Ei´gfiahrt is a worn, vor launger Zeit, zur oigemeinen Heiterkeit.

A wengal Fröhlichkeit in de zwoa Tog, a jeda mog.

A vo d´Nochbarortschoften kumman´s daher,

des vüle Kot steart heitzutoge eh kann mehr.

 

Au´zong wird heit s´schene Gwaund,

geh taunz ma glei amoi mitnand.

D´Musi spüt so schei.

No a Schluckerl zwischendurch, des muaß scho sei.

 

D´Wirtin hot a herg´richt a Hauf´n,

zum Essen, ned nur zum ..... TRINKEN.

 

Den gaunzen Tog gibt´s a Hetz und a Gaudi,

do wird da Opa a nau amoi zum Raudi.

Er wogelt scho daher, jo mei,

s´wa ka Wunder, bei dem Wei´.

 

Und d´Mama sogt zum Voda:

"Morgn host wieda an Koda".

Scheine Mentscha und an Hauf´n Buam,

de do aufg´wogs´n san, so wia de Ruam.

 

Oiwäu lustig und gmiatlich geht´s do zua,

verautwortlich san de Komiteebuschen nur.

De Oidburschen mit a bissl Kondition,

de maunig´smoi Lumpen is a Tradition.

 

Es is beim Kirtog so Sitte,

a Bierfassl wird aufg´stöht in da Mitte.

Ana schlogt´s daun au,

dass a jeder a bissl wos kost´n kau.

 

Nocha nimmt a jeda Bursch sei Madl,

herzagt wearn die strammen Wadl.

Sch´jetzt taunz ma a poar Stickl,

oba brav bleib´m, sunst gibt´s heit no an Wickl.

 

Und a für die Kinder is da Kiritog a Hit,

geh´nemma no wos vom Standler mit.

 

Und zu später Stund, der brave Mau´is a scho miad´,

hot jo allahaund scho konsumiert.

So a Fluchtachterl noch dem vüle Bier,

a Wei´des muaß scho sei!

 

Des kau zwoar dauern a poar Stund´

da Mama wird´s jetzt boid zu bunt.

Da Papa sogt, des is ma wurscht!

I hob nau an gaunz sche´n großen Durscht!

 

Endlich gengan daun olle ham´,

s´woar wieda lustig, der jährliche Tam Tam.

Z´frieden wird no g´sunga  a Hollodaro,

des woar wieda mei scheinsta Kirito(g).